એક્સપ્રેસ વે પર સટપટ ગાડીઓ, બાજુમાં જ હાઇસ્પીડ રેલ કોરિડોર: અમદાવાદથી આ શહેરની વચ્ચે બની રહ્યું છે પહેલું મલ્ટી-મોડલ કોરિડોર

એક્સપ્રેસ વે પર સટપટ ગાડીઓ, બાજુમાં જ હાઇસ્પીડ રેલ કોરિડોર: અમદાવાદથી આ શહેરની વચ્ચે બની રહ્યું છે પહેલું મલ્ટી-મોડલ કોરિડોર

Posted :Saturday 24th of June 2023 05:08:14 PM

Ahmedabad- Dholera Expressway News: આ કોરિડોરની ખાસ વાત એ છે કે, આ પર તમને હાઇ સ્પીડ ટ્રેન અને કાર-ટ્રક એકસાથે ચાલતી જોવા મળશે, 109 કિલોમીટર લાંબા આ એક્સપ્રેસ વેનું નિર્માણ કાર્ય તેજ ગતિએ ચાલી રહ્યું છે

અમદાવાદ-ધોલેરા એક્સપ્રેસવે પોતાનામાં જ અનોખો
દેશનો પ્રથમ હાઈ-સ્પીડ ઈન્ટીગ્રેટેડ મલ્ટી મોડલ કોરિડોર
અહીં હાઇ સ્પીડ ટ્રેન અને કાર-ટ્રક એકસાથે ચાલતી જોવા મળશે

દેશના ખૂણે ખૂણે રોડ ઈન્ફ્રાસ્ટ્રક્ચરને મજબૂત કરવા માટે એક્સપ્રેસ વે અને હાઈવેનું નેટવર્ક બિછાવવામાં આવી રહ્યું છે. ભારતમાં આધુનિક ટેક્નોલોજી સાથે બનાવવામાં આવી રહેલા એક્સપ્રેસ વે પૈકી અમદાવાદ અને ધોલેરા વચ્ચે બનાવવામાં આવી રહેલો અમદાવાદ-ધોલેરા એક્સપ્રેસવે પોતાનામાં જ અનોખો છે. આ દેશનો પ્રથમ હાઈ-સ્પીડ ઈન્ટીગ્રેટેડ મલ્ટી મોડલ કોરિડોર છે. આ કોરિડોરની ખાસ વાત એ છે કે,આ પર તમને હાઇ સ્પીડ ટ્રેન અને કાર-ટ્રક એકસાથે ચાલતી જોવા મળશે. 109 કિલોમીટર લાંબા આ એક્સપ્રેસ વેનું નિર્માણ કાર્ય તેજ ગતિએ ચાલી રહ્યું છે. તે આવતા વર્ષે જાન્યુઆરી સુધીમાં પૂર્ણ થવાની ધારણા છે.

4200 કરોડના ખર્ચે તૈયાર થશે આ એક્સપ્રેસ વે
મહત્વનું છે કે, આશરે રૂ. 4200 કરોડના ખર્ચે બનેલા અમદાવાદ-ધોલેરા એક્સપ્રેસ વેની કુલ પહોળાઈ 120 મીટર છે. તેમાંથી 90 મીટર પર એક્સપ્રેસ વે બનાવવામાં આવશે અને 30 મીટર પહોળી પટ્ટી પર રેપિડ રેલ ટ્રાન્ઝિટ સિસ્ટમ (RRTS) બનાવી શકાશે. દેશમાં હાલમાં દિલ્હી અને મેરઠ વચ્ચે RRTS બનાવવામાં આવી રહ્યું છે. આના પર 160 થી 180 કિમીની ઝડપે ટ્રેનો દોડશે. આ રીતે એકવાર આ કોરિડોર સંપૂર્ણ રીતે કાર્યરત થઈ જશે, તમે ટ્રેનો અને કારની રેસ જોશો. આ એક્સપ્રેસ વે પર કારની મહત્તમ સ્પીડ લિમિટ 120 કિલોમીટર પ્રતિ કલાક હશે.

અમદાવાદ-ધોલેરા એક્સપ્રેસ વે અમદાવાદને ધોલેરા સાથે જોડશે
દેશનું પ્રથમ ગ્રીનફિલ્ડ સ્માર્ટ સિટી અમદાવાદને ધોલેરા સાથે જોડશે. આ એક્સપ્રેસ વેના નિર્માણથી બંને શહેરો વચ્ચેનો મુસાફરીનો સમય ઘટીને માત્ર એક કલાક થઈ જશે. મુંબઈ-અમદાવાદ વચ્ચે આવેલા ધોલેરામાં સ્પેશિયલ ઇન્વેસ્ટમેન્ટ રિજન વિકસાવવામાં આવી રહ્યું છે. તે દેશનું પ્રથમ ગ્રીનફિલ્ડ ઔદ્યોગિક શહેર પણ છે. તે પરિવહનના તમામ માધ્યમો એટલે કે એરપોર્ટ, બંદર, રસ્તા અને મેટ્રો સાથે જોડાયેલ હશે. આ કામમાં અમદાવાદ-ધોલેરા એક્સપ્રેસ વે પ્રોજેક્ટ મહત્વની ભૂમિકા ભજવશે. દિલ્હી-મુંબઈ ઈન્ડસ્ટ્રીયલ કોરિડોર (DMIC)નો એક ભાગ હોવાને કારણે અહીં એક નવું અત્યાધુનિક એરપોર્ટ પણ આવી રહ્યું છે.

મોટા રોકાણની અપેક્ષા 
હાઈસ્પીડ મલ્ટી મોડલ કોરિડોરના નિર્માણથી અમદાવાદથી ધોલેરા વચ્ચેની મુસાફરીમાં ઓછો સમય લાગશે એટલું જ નહીં, દેશના ઔદ્યોગિક વિકાસને પણ નવો વેગ મળશે. ધોલેરા દિલ્હી-મુંબઈ ઈન્ડસ્ટ્રીયલ કોરિડોરનો એક ભાગ બની ગયું છે. આ જ કારણ છે કે તે ઘણા રોકાણકારોને આકર્ષી રહ્યું છે. અમદાવાદ-ધોલેરા એક્સપ્રેસ વે આકાર લેતાં જ અહીં મોટા રોકાણની અપેક્ષા છે.

Source: vtvgujarati